ភ្នំពេញ៖ គណៈកម្មាធិការជាតិរៀបចំការបោះឆ្នោតបានធ្វើការត្រួតពិនិត្យ ផ្ទៀងផ្ទាត់ ឡើងវិញដើម្បីបញ្ជាក់ពីភាពត្រឹមត្រូវនូវលទ្ធផល នៃការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ ឆ្នាំ២០២៤។

ការផ្ទៀងផ្ទាត់នេះធ្វើឡើងនៅស្នាក់ការកណ្ដាល គ.ជ.ប នៅរាជធានីភ្នំពេញ នៅរសៀលម៉ោង២ ថ្ងៃអង្គារ ទី២៧ ខែកុម្ភៈ ឆ្នាំ២០២៤នេះ ដោយមានតំណាងគណបក្សនយោបាយ អ្នកសង្កេតការណ៍ និងសង្គមស៊ីវិលមួយចំនួនបានចូលរួមពិនិត្យការផ្ទៀងផ្ទាត់ផងដែរ។

បន្ទាប់ពីពិនិត្យរួចគឺឃើញថាមិនមានភាពមិនប្រក្រតី ឬកំហុសឆ្គងលើលទ្ធផលបណ្ដោះអាសន្នដែលបានប្រកាសកាលពីថ្ងៃទី២៥ ខែកុម្ភៈនោះទេ។

គួរឱ្យដឹងផងដែរថាកម្ពុជាបានរៀបចំការបោះឆ្នោតព្រឹទ្ធសភាអាណត្តិទី៥ ឆ្នាំ២០២៤ កាលពីថ្ងៃទី២៥ ខែកុម្ភៈ ឆ្នាំ២០២៤ ដោយតាមលទ្ធផលបណ្ដោះអាសន្នមានគណបក្សចំនួន២ទទួលបានសំឡេងគាំទ្រច្រើនជាងនឹងអាចឈានដល់ការគ្រប់គ្រងអាសនៈក្នុងព្រឹទ្ធសភារួមមានគណបក្សប្រជាជនកម្ពុជា និងគណបក្សឆន្ទៈខ្មែរ៕